Ti Krus ken ti Panagsagaba ti Tao

Ti balitok masapul a lumabas iti ingget pudot nga apoy tapno maikkat dagiti rugitna ket rumuar tay husto a sileng ken silapna. Ti bukel saan nga agrusing no saan a maitukit iti daga. Masursuro laeng ti maysa a maladaga ti magna kalpasan ti adu a daras a pannakatumbana. Ti maysa nga atleta dinto agballigi no saanna a kanayonen ti ehersisyona wenno ensayona. Ti kinasanto saan a magun-od iti apagdarikmat. Adu ti masapul nga isukom wenno tallikudam a naipakadawyan kenka. Ti kinasanto kaipapananna ti panangparparitmo ta bagim. “Ti agtarigagay a sumurot kaniak, masapul a tallikudanna ti bagina, ibaklayna ti krusna ket surotennak.”

Ngem no adda man maysa a banag nga ad-adaywan ti tao, isu ti panagrigat/panagsagaba/panagtuok/panagparikut. Kayattay amin ti nanam-ay a panagbiag, e.g. instant mami, instant coffee, remote control, cellphones, pasa-load. Para iti lubong, awan ti imbag ken pateg nga ited ti panagrigat. Tapno saan a masayang ti biagmo, masapul a mapadasam amin a pagragsakan. Out of place ti rigat. No adda mangkontra ti pagragsakam, kill joy. Bagtit ngarud ti tao nga okey lang no aglasat ti adu a rigat. Maag ngarud ti tao nga agtarigagay a sumurot ken Jesus a sibabaklay ti krusna.

No sumangbay dagiti bagyo ti panagbiag, mabalin a makunatayo no dadduma, “Pagayatan ti Dios daytoy.” Ipapaayna laeng dagiti maikari kadatayo gapu iti saan a nasayaat nga inar-aramidtayo. No ania ti immulam, isu met laeng ti aniem. No kastoy ti kapanunotantayo, nalaglag-an lang ti mangibaklay kadagiti rigattayo. Ngem kasano ngaruden no layusendatayo ti adu a problema idinto nga iti panagkunatayo, agbibiagtayo met nga addaan panagbuteng iti Dios ken panagraem iti padam a tao? Ania’t nagbalinan ti hustisya ti Dios?

Mabalin a no dadduma, ti pangrukodantayo no ay-ayatennatayo ti Dios wenno saan ket no nanam-aytayo wenno rigat la ti adda kadatayo. No nanam-ayka, pampanunotennaka ti Dios. No nakakaasi ti kasasaadmo, awan ti naganmo iti listaan ti Dios.

Ngem panagsagaba ti wagas ni Apo Dios tapno pabaroenna ti lubong, tapno sang-awanna ti lubong iti baro nga espiritu. Agpayso, addatayo ditoy lubong. Ngem saantayo a para iti lubong. Para kadatayo a mamati ken agtalek iti Dios, ti panagsagaba ti dalan nga agturong iti biag.

i. Ni Noah ken ti layus. Ti dakkel a layus ti wagas ti Dios tapno pabaroenna ti lubong.
ii. Ni Pedro maipanggep iti panagsagaba ni Apo Jesus
iii. Is. 55,8-9: "Ti panunotko saan a kas iti panunotyo, ket ti aramidko saan a kas kadagiti aramidyo. No kasano a nangatngato ti langit ngem ti daga, kasta met a nangatngato ti wagas ken panunotko ngen ti wagas ken panunotyo."

Saan a pagayatan ti Dios ti panagsagabatayo. Saan nga agragsak ti Dios a mangbuybuya kadatayo nga agsagsagaba. Numan pay kasta palubosanna daytoy tapno iti kasta mapakired ken mapauneg dagiti birtudestayo, nangnangruna ti panagitured ken panagibtur. Masursurotay pay ti mangaasi ti padatayo nga agrigrigat. No awan ti panagsagaba, saan nga adayo a malipantantay met nga ikkan ti importansya ti sumagmamano a banag, kas koma ti salun-at. No agsagaba ti maysa a tao, maipalagip kenkuana ti nakaayabanna, nga isu ti biag nga agnanayon (biag nga awan pagkuranganna). Ti lubong adda pagpatinggaanna, ket agdaldalyasattay laeng ditoy lubong. Silalagiptay ngad koma kadagiti ballaag ni Apo Jesus maipapan kadagiti kinabaknang ditoy lubong.

No adda sumangbay a pakatuokan, awatentay koma ngarud daytoy nga addaan pammati ken panagtalek iti Dios. “Dikay agdanag. Addaakto a kankanayon ta sibayyo.”

Babaen ti panagsagaba, babaen ti nasantoan a krus, insalakan ni Apo Jesus ti lubong. Ngarud, adda pateg ti panagsagaba. Adda ited a kinagasat dagiti pakarigatan ni biag. Dagiti nakapsut wenno awan ti talek ken pammatina iti Dios, dida maamiris daytoy. Uray ni Pedro, idi un-unana nakullaapan met dagiti matana iti daytoy a kinapudno. Iti gayam likudan ti krus ti pakasarakan ti biag. Saantay ngarud koma a mabuteng a mangsango kadagiti krus ti biag. Ni Apo Jesus a nagsagaba iti napalalo gapu kadatayo umaynatayo saranayen. (Fr. Tom)