Ti Maysa A Padi

Saanto a pulos maawanan ti lubong kadagiti tattao a pagragsakanda ti mangirurumen kadagiti papadi. No ti maysa a padi maitibkol ket maitublak, layusenda kadagiti pammabain ken dunorenda babaen ti panangang-angawda. Pagsiglatan ken paggugusto dagiti dadduma ti mangbirok kadagiti bambanag a makapasakit kenkuana. Adda pay dagitay saan nga agpangadua a mangpardaya kenkuana. Pagsasaritaanda dagiti sanikuana wenno dagiti bambanag a naipundarna, ket kunada a gamrud wenno agruprupat’ kuarta, numan pay masansan nga awan met nakappapati a mangpaneknek iti saoda, ket dida pay ipaay kenkuana tay maysa kadagiti kangrunaan a kalinteganna, ti kalintegan a mangdependar ti bagina kadagiti ibatbatoda a pammabasol kenkuana.

Ni Apo Padi saan a maysa nga anghel. Saan met a maysa a superhero. Tao laeng kas kadakayo. Adda dagiti pagriroanna, adda dagiti pagkapsutanna, ket no dadduma, maitikleb gapu iti kinarasina a kas tao. Ngem no iti tengnga iti rabii, no naimasen ti turog ti amin, adda awag a masapul a malanaan ti maysa a kabsat a masakit ken maisagana iti isasaklangna iti Dios a Namarsua, saanto nga agtaktak a mangpanaw tay naimeng ken natalged a silidna iti kumbento tapno idawdawatanna ken liwliwaenna dayta a kabsat, saan met a mapalakpakan. No agballasiw ti karayan, magna iti minilmilya, irisgona ti bagina iti nadumaduma a pagpeggadan tapno masarungkaranna dagiti tattao ti Dios ken maurnongna a mangrambak iti Nasantoan a Eukaristia, awan met maawatna a pammadayaw. No aramidenna ti kabaelanna tapno maiwanwanna a nasayaat ti eskuela, saan met a maukkoran iti medalya wenno maiyawatan ti tropeo ken plake. Ngem numan pay kasta, saan a birbiroken ni Apo Padi ti pannakaitan-okna ditoy rabaw ti daga.

Ni Apo Padi annugotenna ti saanna koma a pannakaikari nga agserbi iti Dios a kas padi ta nalawag kenkuana ken aklonenna ti kinakurapayna, ti kinababana, ti kinakapuyna, ti kinamanagbasolna. Ngem gapu iti ayat ken kaasina kadagiti tattaona, ti Dios mangawag kadagiti lallaki nga agserbi iti pannakaituloy ti makaisalakan a mision ni Apo Jesus a Cristo. Ngarud, ni Apo Padi napili nga agserbi iti Dios iti naisangsangayan a wagas, naisangsangayan isuna a sanikua ti Dios ken nasantoan a kalasugan ti parabur ken ayat ti Dios ditoy lubong.

Iti panagserbi ni Apo Padi, adu dagiti tinallikudan ken insukona. Insukona ti wayawayana a mangbangon ti bukodna a pamilya tapno siwawayayawaya nga agbalin a kameng dagiti adu a pamilya. Tinallikudanna ti tarigagayna nga agbalin nga ama ti pagtaengan tapno isu ti tumakder nga ama dagiti annak ti Dios. No dagiti dadduma, mapadasan ken mariknada ti ganas ken rigat ti mangisakad ti panagadal dagiti annakda, ni Apo Padi saan. No dagiti dadduma, adda dagiti asawa ken annakda nga agur-uray kadakuada iti panagawidda ken mangpukaw ti bannogda, ni Apo Padi awan. Ngem iti laksid dagitoy, naragsak latta ni Apo Padi.

Ngem apay ngata a no ni Apo Padi ti agriro wenno agkamali, narigat dagiti tattao nga awaten ken pakawanen isuna? No dadduma, di pay ketdi ammon ni Apo Padi ti pagtaktakderanna:

No nasapa a sumangpet Ni Apo Padi kadagiti dar-ayanna wenno adda iti husto nga oras no mangmisa ket maladaw dagiti tattao, kunada: “Insapana tay relona.” No met iladladawna, kunada a dina ammo ti orasna.

No atiddog ti sermonna, kunada a makabannog ti agdengngeg kenkuana. Ngem no iyab-ababana, kunada met a saan a nakasagana.

No dagiti adda kayana ti masansan a kadduana, kunada nga elitista isuna. Ngem no met asideg isuna kadagiti simple a tattao, kunada a kagurana dagiti babaknang.

No babbai laeng ti kadkadduana, kunada: “Babaero.” No met lallaki ti ad-adda a kakuykuyogna, kunada: “Tukkol.”

No adda baro a luganna, kunada a sabsabali ti prioridadna. Ngem no met awan ti luganna wenno saan a makaay-ayo ti manmanehoenna, kunada a masapulen a masuktan ti luganna.

No agsao maipanggep ti politika ket tubngarenna dagiti dakes nga aramid dagiti politico, kunada a makisawsawsaw; agkararag laeng ti trabahona. Ngem no met saan nga agsao, kunada nga awan bibiangna wenno umel.

No ruar a ruar ti kumbento, kunada a walay. Ngem no met saan a rumrummuar, kunada a dina ammo ti makibagay ken makidanggay.

No maimasanna ti mangan, kunada a lam-og. Ngem no met bassit ti kanenna, kunada a napili unay.

No ubing ti maysa a padi, kunada: “Bassit pay ti ammona.” Ngem no lakayen ti maysa a padi, kuna dagiti tattao: “Masapulnan ti aginana. Daanen ti ammona. Awanen ti baelna.”

Daytoy ti biag ti maysa a padi. Addanto latta dagiti nalalaing ngem isuna. Ngem no pumanaw wenno matay, awan met ti mabalin a sumukat kenkuana.

Saan a ti naimbag a kinatao wenno aramid ti maysa a padi ti mamagbalin kenkuana a padi. Ti aramid ti Dios ti mamagbalin kenkuana a padi. Ti kinapadi ngarud ket maysa a sagut. Ngem daytoy saan laeng a sagut ti Dios iti padi, no di ket ti kinapadi ti maysa a padi ket sagut ti Dios kadagiti tattao.

Wen, kas iti amin, managbasol met ni Apo Padi. Iti laksid daytoy a kinapudno, maibaon isuna a mangikasaba iti naimbag a damag, saan a gapu ta nangatngato isuna ngem dagiti dadduma ngem gapu ta binilin ni Cristo a Kangatoan a Padi.

Ayaten ken ipategyo dagiti papadi ta uray makapurar dagiti biddutda, naimaldit ket bagbagkatenda a kankanayon ken iti unos ti panagbiagda ti marka ni Cristo a Naimbag a Pastor.

Kakabsat, agyamankami kadagiti amin nga imbagyo kadakami a papadiyo. Dawatenmi ti panangawat ken panangpakawanyo kadakami kadagiti gundaway nga agkurangkami kadakayo. Ipangrunami man a kiddawen ti panangikarkararagyo kadakami ta agbalinkami koma a naanep ken napudno iti panagserbimi iti Dios ken kadagiti tattaona. (Inurnos ni Fr. Tom)