Ti Krus ket Bendision

"Ti agtarigagay a sumurot kaniak masapul nga ibaklayna ti krusna...”

Iti daytoy a gundaway malagipko ni Manny Pacquiao gapu ta sakbay ken tunggal rikos ti boksing, agtandaan. Adda met dagiti basketbolista ti PBA nga agtandaan sakbayda nga agay-ayam. Kasta met kadatayo, no lumabas ken umunegtayo iti simbaan, agtandaantayo met iti krus. Amin dagitoy ipakitada ti kinasiasinotayo - pasurotnatayo ti krus!

Agpayso unay, kakabsat, a ti Krus ti maysa kadagiti kapatgan a ramen ti biagtayo a Cristiano. Ti kinapudnona, maaw-awagantayo a relihion ti Krus agsipud ta ti tanda ti kina-Cristianotayo ket ti Krus.

Ti kinapudnona, idi nabuniagantayo kastoy ti kuna ti padi: “Felimon, iti nagan ti nacristianoan a gimong awatenka nga agpaay ken Cristo ket yugisko kenka ti tanda ti krus ni Cristo a nangisalakan kadatayo.” Naimaldit ngarud kadatayo ti tanda ti Krus manipud iti dayta a kanito. Manipud met laeng iti dayta a kanito, nagbalintayon a pasurot ti Krus. Isu't gapuna a no irugitayo a rambakan ti Nasantoan a Misa, agtandaantayo iti krus. Sakbay a mabasa ti evanjelio, agtandaantay manen, agsipud ta awan sabali a tanda wenno pagilasinan a Catolicotayo, no saan a ti Krus!

Ngem ti yanna a rigat, adu kadagiti Cristiano ti madi iti krus. Adu kadagiti Catolico ti agkedked a ma-addaan iti krus. Kayatda piman nga itarayan ti krus. Yes, we run away from danger because we must preserve ourselves, but we must not run away from the cross. The cross is not our danger, the cross is our salvation! We do not run away from the cross, we run away from sin. We do not run away from Jesus Christ, we run away from the evil one. Wen, itarayantayo ti peggad tapno mailisitayo iti didigra, ngem saan a rumbeng nga itarayantayo ti krus agsipud ta ti krus ti salakantayo! Ti basol ti rumbeng nga itarayantayo, saan ket a ti krus. Ni Satanas ti rumbeng nga itarayantayo, saan ket a ni Apo Jesus!

Laglagipentayo a no mangted man ti Apo iti pakarikutantayo, saan a gapu ta binaybay-annatayon, saan a gapu ta nalipatannatayon, saan a gapu ta tinallikudannatayon ken saan met a gapu ta naliwayannatayon, ngem gapu laeng iti ayatna nga iparaman kadatayo ti kapatgan a gamengna – ket daytoy awan sabali no di ti Krusna! We should, therefore, rejoice in the cross. Remember that in every blessing is a cross, and in every cross is a blessing!

Wen, kakabsat, tunggal mangbendision ti padi – adda latta ti krus. Awan ti bendision nga awan ti tanda ti krus. Isu a no malpas ti tunggal misa agtandaantayo iti krus, saanen a tapno iparangarantayo ti kinasiasinotayo ngem tapno mabendisionantayo. Gapuna a ti siasinoman a madi iti krus, awan met kalinteganna a mabendisionan!

Ibaklayyo ti krusyo, kakabsat. Wen, ibaklayyo ti krusyo ken dikay kad ibbatan lattan. Awitenyo ti krusyo ken dikay kad ibati lattan iti uray sadinoman. Awitenyo ti krusyo ken dikay kad satsaten lattan. Awitenyo ti krusyo ken dikay kad ipadpadawat lattan! (Fr. Walde Batoon)