Pastoral Letter, No. 1, Series of 2008 (A Pastoral Letter on the Occasion of the 47th Foundation Anniversary of the Diocese)

SURAT PASTORAL
(on the occasion of the 47th foundation anniversary of the diocese)

“Saan a rumbeng a baybay-anmi ti pannakaikaskasaba ti Sao ti Dios . . .” (Aramid 6, 2)

Patpatgek a Kakabsatko ken Cristo :

Idi 16 ti Disyembre 1989, naangay ti Diocesan Bible Congress nga addaan iti tema: Commitment to the WORD for the Renewal of the Diocese. Naaramid daytoy tapno mapagsasaritaan ti awis ti Vatican II a ti Sao ti Dios ket mabasa, mailualo, maibingay ken maibiag koma kadagiti kaaduan a tattao. Daytoy met a tawen 2008 ti improklamar dagiti Obispo ti Filipinas a pannakarambak ti Year of the Word of God. Rumbeng a maaddaantayo ti naan-anay a panawen a mangpabaro iti panangawat ken panangipategtayo iti Sao ti Dios.

Ngarud, inton Hulyo 26, Sabado, ti maika-47 nga anibersaryo ti Diocesistayo, angayentayo ti Diocesan Bible Congress II idiay St. Mary’s Seminary, Mangato, Laoag City a ti temana ket: The Word of God in the Life and Mission of the Church. Panggep daytoy a Congreso ti panangwardas ken panangilimpiotayo kadagiti nadumaduma a plano ken programatayo a pastoral iti Diocesis ken kadagiti parparokia tapno maibatay ti Biag ken Misyon ti simbaan iti Sao ti Dios.

BIAG TI SIMBAAN

Ti Sao ti Dios awisennatayo a mangibiag iti pannursuro ni Apo Jesus ken mangsaksi kadagiti aramidna iti kagimongan. Nabileg ti Bibliya a pagubbogan ti pammati, namnama ken panagkikinnammayet dagiti tattao ti Dios. Matartaraonan ti Simbaan iti Sao ti Dios iti liturhiya ken lualo, iti panangkaskasaba, iti katekesis, iti teolohiya ken iti inaldaw a biag dagiti mamati. Sapay koma ta ti Sao ti Dios ket agbalin a napateg a paset ti biag ti tunggal Catolico iti personal a biagna, iti famfamilia, iti sangkakarubaan, kadagiti organisasyon a relihioso, ken iti parrokia.

MISYON TI SIMBAAN

Ti Sao ti Dios ket addaan ti pannakabalin a mangbalbaliw iti personal a panagbiag ti tunggal maysa ken kasta met ti kagimongan. Ti panagbasa ken pannakaawat iti Sao ket wagas a mangted kadatayo iti naan-anay a lawag ken pammati tapno in-inut a makapagbalbaliwtayo ket makabukeltayo iti gimong a nakristianoan. Nasakit nga awaten ti kinapudno nga agingga iti agdama, adu pay ti saan a nakangngeg iti ebangelio, adda dagitay nakalipaten ket adu pay met dagitay mabisin iti Sao ti Apo. Dagitoy dagiti tamingentayo ti Diocesan Bible Congress II.

TAWEN NI SAN PABLO

Improklamar ni Santo Papa Benedicto XVI a ti tawen manipud June 29, 2008 agingga iti June 28, 2009 ket makuna a Pauline Year kas pannakaisagana ti panangrambak iti maika-2000 a tawen ti pannakayanak ni San Pablo Apostol. Alaentayo daytoy a gundaway a mangammo, agayat, ken mangtulad kadaytoy natan-ok nga Apostol dagiti Hentil. Gundawaytay met a mangpanunot ken dumngeg iti napalaus a panagas-asug ti nakaparsuaan (Rom. 8, 22) gapu kadagiti inhustisya ken pannaka-abuso a sagsagabaen ti Ina a Daga baben iti kinagamrud dagiti tattao iti pirak ken turay.

Dawatek ngarud a ti tunggal parrokia mangibaon iti 15-17 a delegados nga aktibo iti nadumaduma a programa ken aktibidades ti parrokiada para ti Congreso. Agkaykaysatayo amin nga agbasa, aglualo, mangibiag ken mangiburay iti Sao ti Dios. Sapay koma ta ibabaetnatayo ni Apo Santa Maria, Ina a namati iti Sao, iti pannakaawattayo ti Sao ti Apo ken iti panagballaigi ti Diocesan Bible Congress II.
Awis ken tarigagay para iti naragsak ken napnoan kaipapanan a pannakarambak ti anibersaryo ti Diocesis ti Laoag inton 26 ti Hulyo.


Toy siaayat nga agserbi,

+ SERGIO L. UTLEG, D.D.
Obispo ti Laoag

Maika-29 ti Hunyo, 2008, Fiesta da San Pedro ken San Pablo

(to be read in all the Churches of the Diocese of Laoag on July 6, 2008)